PUISI KANGGO BAPA

Bapa.., Abdi terang Salira teu ngandung Abdi, tapi apan getih Anjeun aya ditiap urat-urat raga Abdi, Anjeun ngawariskeun mere maweh berehan sinareng handap asor

Bapa.., Salira memang sanes nu ngalahirkeun Abdi, tapi aweuhan sora adzan Anjeun mitemeyan ngawawuhkeun Abdi sareng jalan ka Allah, Gusti Abdi

Bapa.., Abdi terang Salira sanes nu nyusuan, tapi apan tina tiap keclak kesang Salira, huap sinareng regotna nu ngajantenkeun cai susu keur Abdi

Bapa.., Abdi terang Salira teu salawasna ngajaga Abdi, tapi Abdi terang diunggal do’a Salira teu kantos luput nyebat nami palaputra Salira

Bapa.., Abdi teu kantos nguping Salira sumegruk nangis.., satadina dibabade Salira teh kuat teger

Tapi geuning henteu..., Salira nahan kanyeri kasedih estuning supados Abdi teu hangham nyalindung dina weweg pangadeg Salira nalika Abdi honcewang sumoreang

Bapa..., kadang kawis Abdi sok hoyong naros, naha tangkeupan Salira teu haneut sapertos tangkeupan Ema

Abdi ngaboa-boa, boa Salira teu patos nyaah siga Ema

Tapi geuning henteu.., saestuna Salira hariwang teu tiasa ngecagkeun raket pageuh pangeukeup, nalika waktosna cunduk kuring sawawa dewasa nyilih ngaganti disagedengen Salira

Bapa.., naha Anjeun teu katawis hariwang ningal Abdi nalika raheut nepi rek pupus pangharepan

Satadina manawi Salira teu rumawat ka diri Abdi, sakumaha Ema nu karaos titen mikamelang

Tapi geuning lepat.., Salira tega nahan rasa ka diri Abdi margi miharep palaputra, tumuwuh pinuh pangaweruh bari mandiri, sabar, kuat teu hengker jeung tigin jangji

Bapa.., sanaos surga aya dina dampal sampean indung, tapi apan Ema teh tulang iga Salira Bapaa..., Salira duaan panutan Abdi

Nuhun Bapa.., Salira tos ngajarkeun naon rupi kasaean

Hapunten Apa..., hapunten,,,

SimAbdi nu tacan tiasa ngaronjat kamampuh geusan ngabagjakeun Salira, mung do,a nu salawasna nganteng ka Gusti kanggo Salira

Hapunten Apa..., Abdi ukur tiasa misono diwaktu anggang, apan geuning mun pendak mah siga nu enya ripuh ku kahirupan

Apa...Abdi sono paaa...