MAPAG BAGEA

Nyaliksik sisi-sisi peuting, ngalelebah boa-boa papagan peteng, sugan jeung sugan salira barangtunda, sedeng bentang teu cukup nyaangan da bulan kahalangan mega malang, beh mana atuh ?

Da kiricik cainamah eces kadenge, siga jeung sugan laluncatan miheulaan kahayang, majar aya tiis sumanding marengan hegar,

Lalangse peuting ngandelan, poek mongkleng teu malire kahayang, kahayang nu geus lila disidem, satadina sugan ayeuna rek kajewang kadongkang

Angin peuting tiis nyecep, nganteur maturan bari siga mupuas, kalan-kalan ngaharewosan ngajak balik mulih pakandangan

Ngan hate panceg ngupahan tuur, nuuskeun kesang, apan isukan tereh datang, tuh gera ibun geus mimiti aya najan kapiheulaan sono,

Janari leutik geus kapetik, sumirat hibar beh wetan totonden poe, indung suku beuki segut mawa nungtun mapag beurang, endah geuning batan impian

Reumis maseuhan bitis, pucuk eurih ngageurih ramo ramo suku sesa kamari, teu dipalire... Sawangan jadi kanyataan kahibaran srangenge, geuning anjeun tigin nganti dina mumunggang kanyaah

Bagea beurang, bagea kabagjan, bagea jungjunan akang... Hatur nuhun salira tos tuhu nungguan, tigin nganti najan katiisan peuting bari sideku kabulusan jaba jauh nyorangan

Hayu jungjunan urang mapag ngabageakeun bagja urang parat beurang nepi ka tungtung peuting