JANUARI ATAWA NAON NYA POHO.....

"geus.. atuh milu sakali kali ningali kamajuan jaman, tong sieun da jaman mah nu urang lin ? jadi urang we sing tarapti tur pinter ngigeulanna..."

kitu kalimah panungtung tina saborondoyot rayuan ngayakinkeun kuring manehna basa keukeuh kuring embung ngilu ka karoke..., ari kuring pangna embung malum pan urang lembur, dusun, eraan jaba utamana teu nyaho kumaha tatakrama di eta tempat...., tapi ahirna kuring ngilu kana pangajakna, malahan kungsi sasab heula memeh nepi ka manehna nu nungguan di hiji tempat...

***kacaritakeun... kuring geus panggih jeung geus asup ka eta tempat karaoke...****


torojol aya palayan...

"bade pesen naon pak..."

"jang uing mah budak tong bapak lah..." ceuk kuring da rarasaan teh masih keneh ngora apanan

"eny om.."

"euh... silaing mah..sarua keneh atuh kehed... tapi bae we, ngan ieu teh kumaha makena jang ?"

"hehehehe.... kieu om, tingal lagu nu bade diputer ke nomerna pencet.. tah kieu gera..., teras pencet nu ieu..., terus nu ieu.. tah ke pami bade deui teras pencet ieu.. terus itu.." ceuk palayan mani capetang bari tutunjuk...

"heueuh ...nuhun jang...." ceuk kuring..

"kang sanes bade pesen leueuteun atanapi tuangeun..." ceuk nungajak kuring bari noel

"oh enya.... jang... jang pesen cai kopi dua jang...."

sanggeus tuluy palayan...kuring mimiti neangan lagu....maksud rek nyanyi, tapi weuleh teu kapanggih eta lagu teh....

"sok we teteh lah uing mah ngiluan we..." ceuk kuring kanu ngajak, da kuring hayang lagu eta nu euweuh tea....

"enya atuh..." bari terus manehna mencet itu mencet ieu... ngong we nyanyi...

"jang engke teh bakal aya batur teteh kadieu, malah....." teu kebat manehna ngomong hapena disada " tuh geuning geus datang cig papageun" ceuk manehna bari nuluykeun nyanyi

"wilujeng tepang... ngenalkeun kuring..." jeung saterusna sanggeus maranehna asup,

"ngiringan ah... ceuk semah"m bari muka buku nu terus pencet itu pencet ieu...terus manehna oge nyanyi sorana alus pisan malah, "jang pang neangkeun lagu dangdut judulna ZAINAL" ceuk manehna bari terus nyanyi..

"teu aya teh ...."ceuk kuring sanggeus... ngotektak neangan lagu nudititah diteangan tadi,

"euh teu leungkep lagu teh...cing kadieu nginjeum bukuna jang..." ceuk manehna bari terus mukaan buku..."ieu aya jang....ceuk manehna bari terus mencet2 deui tombol..."

"numana teh ?" ceuk kuring

"ieu apan aya Z A E N A L..." tembal manehna

kuring ningali bari nyerengehhhhh.... "hehehehehe.... abdi tadi ningalina dina daptar EUJ (J) teh..." ceuk kuring rada era....can rengse era...lagu ganti.....'desember kelabu slalu menghantui ....'

kuring ampir luncat bari ngajorowok "TEH ETA GEUNING LAGU UING AYA...TADIMAH EUWEUH..." bakat ku bungah

"naha ilaing tadi neangan lagu naon....?"

"ENYA ETA LAGU JANUARI KELABU...."

"LAIN JANUARI ATUH DESEMBER.............. KEHED, diteangan dua taun ge moal aya bebel" ceuk kabehan bari ngabarakatak.....

***"OH DESEMBER......LAIN JANUARI... DA BASA ETAMAH SIDIK ATUH JANUARI EUY...."***